Кытайда Будданын башын уурдагандарды кармаган кароолчунун аялы сыйланды

БИШКЕК, 24-сен. — Sputnik. Кытайдын Сычуань облусунда улгайып калган аял Будда эстелигинин башын алууга аракет кылган эки ууруга тоскоолдук кылгандыгы үчүн бир миң юань (150 долларга чукул) акчалай сыйлык менен сыйланды. Бул тууралуу РИА Новости билдирди.

Окуя былтыркы жылдын июнь айында болгон. Аракети ишке ашпай калган ууруларга соттун өкүмү чыгып, бири беш жыл 9 ай, экинчиси эки жыл беш айга кесилгенден кийин ЖМКлар бул тууралуу жазып чыккан.

Ал күнү 68 жаштагы Пань Юаньцзюй күйөөсү кароолчу болуп иштеген Муюй деген тоодогу тарыхый жерде болчу. Бул райондо Тан династиясынын убагына таандык 700гө чукул Будда эстелиги жайгашып келген. Кечинде ал аял эстеликтер жайгашкан жактан шектүү үн угуп калат да, ошол жакка абай салат да эки адам Будда эстелигинин башын алууга аракет кылып жатканын көрөт. Уурулап кароолчунун жубайы ооз басар иретинде берилген акчага да болбой, кылмышкерлерди өзү колго түшүрүүгө аракет кылган. Уурулар жакын турган жүк ташуучу унааны айдай качайын дегенде, улгайган аял дөңгөлөктү кармап алып кое бербей койгон. Мындан улам кылмышкерлер эстеликтин башын таштап, жөө качышкан.

Андан соң кылмыш болгон жерге полиция кызматкерлери келип, бирок шектүүлөрдү дароо кармай алышкан эмес. Кийин алар колго түшүрүлүп, тарыхый эстеликтерди уурдаган уюшкан топтун мүчөлөрү экени аныкталган. Ал эми аял сыйлыкка көрсөтүлгөн.