Бишкек шаарындагы мекемелердин кызматчылары документтерин кыргызча жазып калды. Бул тууралуу Бишкек мэриясынын алдындагы Мамлекеттик тилди өнүктүрүү бөлүмүнүн жетекчиси Элвира Ниязбекова Sputnik Кыргызстан радиосуна маек куруп жатып билдирди.
Анын айтымында, жаңы өзгөртүүлөр жакшы жыйынтык берүүдө.
"Быйыл мэриянын токтомуна жаңы өзгөртүүлөр кирди. Анда "мамлекеттик тилди өнүктүрүү боюнча адис" жана "лингвист эксперт" деп эки бөлөк жазылган. Мурда мекемелер аларды котормочу катары колдонуп келишкен. Кызматкерлер документтерди орусча жазып, аларга котормого таштап кетип калышчу. Азыр болсо ар бир кызматкер документтерин эки тилде өздөрү даярдайт", — деди Ниязбекова.
Ал жаңы өзгөртүүлөрдүн арты менен кызматкерлер кыргыз тилин үйрөнүүгө аргасыз болуп жатканын кошумчалады.
