Ап, бали! Бишкекте күндүн энергиясы колдонула баштады

БИШКЕК, 22-сен. — Sputnik. "Бишкекжылуулукэнерго" ишканасында жаңы гелиоколлекторлордун — күндүн энергиясын топтой турчу жабдуунун бет ачары болду. Бул тууралуу мэриянын маалымат кызматы билдирди.

Ачылыш салтанатына вице-премьер Дүйшөнбек Зилалиев, калаа башчысы Албек Ибраимов, "Бишкекжылуулукэнерго" коммуналдык ишканасынын башчысы Алимбек Абдылаев баштаган жетекчилер катышты.

Шаар башчысы Ибраимов учурда жаңы ыкманы сыноо үчүн 364 коллектор орнотулганын баса белгиледи. Коюлган жабдуулардын жалпы кубаттуулугу 0,518 мегаватты, же саатына 0,445 гигакалорийди түзөт. Бул энергия социалдык объектилерге берилет. Күндүн энергиясын колдонуу менен жылына 124 миң кубометр газ же учурдагы тариф менен алганда 2,2 миллион сом үнөмдөлөт.

Гагарин казан мешинен жылуулукту №5 мончо, №141 балдар бакчасы, №55 мектеп, №20, 94, 91 кесиптик лицейлер жана төрт жатакана алат.

Мэр ошондой эле жылытуу мезгили башталганга чейин Орто-Сай казан мешине дагы күндүн электр энергиясын ала турчу жабдуулар орнотуларын кошумчалады.

Өз кезегинде вице-премьер Зилалиев бул ыкманы Кыргызстандын бардык аймактарында жайылтуу керектигин баса белгиледи.

Аталган долбоорду ишке ашыруу үчүн Айлана-чөйрөнү коргоо боюнча республикалык фонддун башкармалыгынын чечими менен 10,6 миллион сом биргелешип каржылоо шарты менен бөлүнгөн. Жалпы баасы 14,8 миллион сомду түзөт.