ОШ, 18-сен. — Sputnik. Чоң-Алай районунда улуу кызын турмушка узатып жаткан үй-бүлө той күнү жол кырсыгына кабылган тогуз жаштагы кичүү кызынан айрылып калды. Бул тууралуу кыздардын атасынын бир тууган иниси Майрамбек Тагаев Sputnik Кыргызстан агенттигине билдирди.
Эске сала кетсек, кечээ, 17-сентябрда саат 14.00дөр чамасында Сары-Таш — Карамык унаа жолунун 112-чакырымында 17 жаштагы окуучу бала башкарып бараткан унаа оодарылып кеткен. Анын кесепетинен 9 жана 16 жаштагы кыздар көз жуумп, айдоочу менен жүргүнчү эки кыз оор абалда ооруканага түшкөн.
Тагаевдин айтымында, анын бир тууган агасы Анарбек Тагаев 18 жаштагы кызын КараМык айылына турмушка узатып жаткан.
Ал ошондой эле агасы Анарбек Тагаев бир күн ичинде бир кызын турмушка узатып, экинчи кызынан айрылып калгандыгын кошумчалады.
"Угушума караганда, кырсыкка себепкер айдоочу буйрутма менен чыккан экен. Ал экинчи унаадагы айдоочу менен жарышып ойногон. Кырсыктын кесепетинен агам 2-класста окуган кызынан айрылып калды. Учурда айдоочунун үстүнөн арыз деле жазган жокпуз. Агам каза болгон кызынын сөөгүн жерге берди. А мен болсо комада жаткан кызым менен убарамын", — деди ал.
Тагаев кырсык катталгандан кийин той токтоп аза күтүлгөнүн, каза тапкан кыздардын бири турмушка чыгып жаткан кыздын курбусу болгонун кошумчалады.
Ал эми Чоң-Алай районунун жалпы дарыгерлеринин практикалык борборунун директорунун орун басары Арстанбек Карыбасовдун айтымында, жабыркаган айдоочу менен эки кыз оор абалда жатат.
"17 жаштагы айдоочу баланын баш мээси чайкалып, көкүрөк клеткалары менен омурткасы жабыркаган. 18 жаштагы жүргүнчү кыздын да баш мээси чайкалып, омуртка сөөгү сынган. Ал эми 14 жаштагы кыздын баш эти айрылып, сол акыреги сынган жана омурткасы жабыркаган", — деди Карыбасов.
Дарыгер учурда бейтаптарга тиешелүү медициналык жардам көрсөтүлүп жатканын кошумчалады.
