БИШКЕК, 14-сен. — Sputnik. Кыргызстандын курама командасы Эл аралык футбол федерациясынын (FIFA) рейтингинде алты сапка алдыга көтөрүлүп, 122-орунду ээледи.
Август айындагы рейтингде Кыргызстан 128-орунда турган. Улуттук команда өткөн айда бир дагы расмий оюндарга катышкан эмес.
Мьянма курама командасы 152-орунду камсыздады. Алар 5-сентябрда Бишкекте Кыргызстан менен беттешмек, бирок коопсуздук маселелеринен улам оюн өтпөй калган.
Өткөн айдын эң мыкты командасы деп 47 тепкичке алдыга көтөрүлүп, 67-орунду ээлеген Кабо-Верде таанылса, эң начар деп Гватемала аталды (31 позицияга артка кетип, 131-орунда).
Ал эми Германия Бразилияны артта калтырып, биринчи орунга көтөрүлдү. Үчүнчүдө Португалия курама командасы келе жатат.
Россиянын футболчулары болсо өз позициясын жоготуу менен антирекорд коюп, 64-орунду ээледи. Аталган команда биринчи ирет төмөнкү орунга түштү.
