БИШКЕК, 13-сен. — Sputnik. Кыргызстандык Валентина Шевченко бразилиялык мушкер Аманда Нуньес менен болгон беттештин жыйынтыгына нааразы экенин билдирген.
Канаданын Эдмонтон шаарында өткөн UFC 215 беттешинин жыйынтыгында Шевченко Нуньеске упай менен жеңилип калган.
Валентина Шевченко өз кайрылуусун социалдык баракчага жарыялады.
Күйөрмандарга ыраазычылык билдирген Шевченко каршылашы чабал аракеттерди көргөндүктөн бир эле учурда чабуулга жана контрчабуулга өтүүгө аргасыз болгонун баса белгилейт.
"Айрамдары ал (Нуньес — ред.) октагондун ортосун ээлегендиктен ага артыкчылык берди деп айтып жатышат. Биздин беттеште "октагондун ортосун ээлеп, жеңишке жет" деген түшүнүк жок. Сен сегиз бурчтуктун ортосун ээлеп алып, бирок бардык соккуларды өзүңө кабыл алышың мүмкүн. Мушкер октагондун ичин толугу менен колдонуп, ал жерден өзүнүн тактикасын жана стилин колдонушу керек", — деп жазды Шевченко.
Калыстардын чыгарган чечимине көңүлү чөккөнүн, бирок андан улам депрессияга түшпөй турганын баса белгиледи.
Шевченко кайрылуусунун аягында бразилиялык мушкер менен беттешип калышы мүмкүн экенин айтты.
