Ош: милициянын мурдагы кызматкерин сабап өлтүрүүгө шектелгендер кармалды
Ош: милициянын мурдагы кызматкерин сабап өлтүрүүгө шектелгендер кармалды
Sputnik Кыргызстан
Шектүүлөр Баткен шаарындагы соода түйүндөрүнүн биринде спирт ичимдиктерин ичишкен. Алардын арасында каза болгон адам дагы болгон. 13.09.2017, Sputnik Кыргызстан
Шектүүлөр Баткен шаарындагы соода түйүндөрүнүн биринде спирт ичимдиктерин ичишкен. Алардын арасында каза болгон адам дагы болгон.
ОШ, 13-сен. — Sputnik. Ошто 31 жаштагы милициянын мурдагы кызматкерин өлтүрүүгө шектелип төрт адам колго түшүрүлдү. Бул тууралуу облустук ИИББдин маалымат катчысы Жанна Сатарбаева Sputnik Кыргызстан агенттигине билдирди.
Эске салсак, Кара-Суу районундагы Төлөйкан айыл аймагынын "Ит качкан" жайлоосунан колу-буту байланган, кабыргалары сынган жана бети-башы көгала болгон адамдын сөөгү табылган. Анын аты-жөнүн тактоо үчүн милиция элге жардам сурап кайрылган.
12-сентябрь күнү шектүү катары Баткен шаарында туулган 26, 29 жана 31 жаштагы төрт жаран колго түшүрүлдү.
"Шектүүлөр 5-сентябрга караган түнү саат 4.00дөр чамасында Баткен шаарындагы соода түйүндөрүнүн биринде спирт ичимдиктерин ичишкен. Алардын арасында каза болгон адам дагы болгон. Ортодо чыр чыгып, үчөө жабыла милициянын мурдагы кызматкерин ур-токмокко алышкан. Кийин анын колу-бутун байлап, сөөгүн Subaru Forester унаасы менен Оштогу "Ит качкан" жайлоосуна жылаңачтап таштап кетишкен", — деди Сатарбаева.
Шектүүлөр из жашыруу максатында Бишкек шаарына келип, маркумдун унаасын арзан баада сатып жиберишкен. Кийин кайра Ош шаарына кайтып барышкан.
Учурда аталган факты боюнча Кылмыш жаза кодексинин 97-беренеси (адам өлтүрүү) боюнча кылмыш иши козголуп, тергөө амалдары жүрүүдө.
Өздүк булактардын маалыматына караганда, маркум буга чейин Баткен ОИИБде милиция кызматкери болуп иштеген. Ал эми шектүүлөрдүн бири буга чейин сот жообуна тартылганы маалым болгон.
