ОШ, 8-сен. Sputnik. Соттук-медициналык экспертизанын бүтүмүнө ылайык 79 жаштагы байбичесин өлтүрүүгө шектелип камакка алынган 83 жаштагы аксакалдын акыл-эси жайында эмес деп табылды. Бул тууралуу Ош облустук сотунун маалымат катчысы Бекзат Осмонкулов Sputnik Кыргызстан агенттигине билдирди.
Кармалган шектүү эми Жалал-Абад облусунун Кызыл-Жар айылындагы республикалык психиатриялык ооруканага дарыланууга жөнөтүлөт.
"Ош шаардык соту Кылмыш-процессуалдык кодексиндеги 29-берененин 2-бөлүмүнүн негизинде кылмыш ишти токтотту. Тергөө иштеринин жүрүшүндө атайын түзүлгөн комиссия 1934-жылы туулган жаран кылган ишине толугу менен жооп бере албайт, акыл-эсинен жабыркайт деген чечим чыгарган", — деди Осмонкулов.
Экспертизанын алгачкы корутундусу шектүү киши кылмыш учурунда мас экени аныктаган.
Жубайлар 1956-жылы баш кошуп, эки уул, төрт кызды тарбиялашкан. Неберелери бар.
