БИШКЕК, 5-сен. — Sputnik. Жети жылга кесилген Нурлан Мотуев №32 жатак колониясына баруудан баш тартууда. Бул тууралуу Sputnik Кыргызстан агенттигине Жаза аткаруу мамлекеттик кызматы билдирди.
Ага ылайык, соттун чечими боюнча Мотуев жазасын жабык эмес жайда өтөйт. Андыктан ал жумасына бир жолу барып каттоого туруу шарты менен үйүнө барып, телефон колдоно алат.
Ал ортодо Мотуев өзүнүн социалдык баракчасы аркылуу өлкө башчысына кайрылып, №32 жатак колониянын жетекчиси Тимур Анаркуловдун ишине көңүл бурууга чакырат. Мотуев колония жетекчисин соттолгондорду мазактап, коррупция менен алектенет деп айыптаган.
"Тимур Анаркулов, сен мурдагы атайын дайырдыктагы жоокерсиң. Сенин боюң эки метр, меники 1,85 метр. Эркекче жекече мушташпайлыбы? Ал Макгрегор менен Мейвезердин шоусу сыяктуу болот. Сен атайын даярдыктагы жоокерсиң, мен көчө мушкеримин", — деген Мотуев.
ЖАМКтын маалымат кызматы соттолгон Мотуевдин билдирүүсү боюнча мекеменин жеке коопуздук кызматы жана юридикалык бөлүм, Акыйкатчы институту жана башка көзөмөлдөөчү органдар алектенип жатканын кошумчалады.
2016-жылдын 29-августунда Нурлан Мотуев Свердлов райондук соту тарыбынан жети жылга кесилген. Мотуев кылмыш жаза кодексинин 226-беренесинин 2-бөлүгү (Террордук ишмердүүлүккө чакыруу) жана 299-беренесининин 1-бөлүгү (Улуттук, расалык, диний жана аймак аралык келишпестикти козутуу) боюнча күнөөлүү деп табылган.
