БИШКЕК, 29-авг. — Sputnik. Кыргызстан эми газ муктаждыгы менен эч кимге жалдырабай калды деген пикирин президент Алмазбек Атамбаев "Газпромдун" каржылоосу менен курулуп жаткан мектептин пайдубалына капсула салып жатып билдирди.
Өлкө башчы бул иш-чарага катышкан "Газпром" ишканасынын башкармалыгынын жетекчиси Алексей Миллерге дагы кайрылды.
"Сиздин келер алдыңызда "Кыгрызгазды" "Газпромго" бардык чириген куурлары менен инвестицияга алмашкан учурду эстедим. Анда Атамбаевге карата чабуул катуу болгон. Керек болсо ал эл душманы, өлкөнүн байлыгын сатып жатат дешкен. Андай айкырыктардан кийин менде да күмөнсүнүү болгон. Бирок убакыт биз ишенимдүү дос жана өнөктөш тапканыбызды көрсөттү", — деди президент.
"Башында бардыгы күмөн санаган биздин иш убакыт көрсөткөндөй өзүн-өзү актады. Эми Кыргызстандын башчысы менен өкмөтү башка мамлекеттин өкмөтүн күнү-түнү сагалабай калды. Газ берсең талаш жерлердин бирин беребиз деп жалдырабай калды", — деди Атамбаев.
Президент өз сөзүндө "Газпром" келгенге чейин газдын бир метр кубунун баасы 260-280 доллар экенин, азыр 150 доллар болуп калганын баса белгиледи.
