БИШКЕК, 27-авг. — Sputnik. Мексика куймасындагы Техас жээгине туш келген "Харви" бороонунун күчү басаңдаганы менен ири суу ташкыны божомолдонуп жатканын АКШнын бороондорду алдын алуу боюнча улуттук борборуна таянуу менен РИА Новости жазды.
"Жума күнү башталган бороондун ылдамдыгы саатына 210 чакырымга жеткен. Борбордун маалыматы боюнча ушу тапта шамалдын ылдамдыгы саатына 155 чакырымды түзүүдө.
"Харви" акырындап Түштүк Техастын ичине кирип бара жатат. Кийинки күндөрү катуу нөшөр болуп, ал ири суу ташкынын шартташы мүмкүн", — деп айтылат билдирүүдө.
Кечээ Кыргызстандын Тышкы иштер министрлиги Техас штатына бара турган кыргызстандыктарга сапардын мөөнөтүн жылдырууга, ал эми ошол аймакта жашап жаткан мекендештерди сак болууга чакырган билдирүү тараткан.
