БИШКЕК, 25-авг. — Sputnik. Өкмөт башчылыкка талапкер Сапар Исаков Конституциялык мыйзамдар, мамлекеттик түзүлүш, соттук-укуктук маселелер жана Жогорку Кеңештин регламенти боюнча комитеттин жыйынында өкмөт мүчөлөрүнүн курамына сунушталгандар тууралуу суроолорго жооп берди.
Депутат Исхак Масалиев эмне себептен 30 жаштагы Артем Новиковду экономика министри кылуу сунушталып жатканын сурады.
"Артем Эдуардович 2007-жылдан бери Экономика министрлигинде иштеген. Кийин өкмөттүн аппаратында вице-премьердин жардамчысы жана кеңешчиси, үч премьердин кеңешчиси болгон. Ал ошондой эле экономика илимдеринин кандидаты. Жаштыгына карабастан абдан тажрыйбалуу жана жакшы адам. Мен аны көптөн бери билем", — деди Исаков.
"Силер бири-бириңерди жакшы таанымак тургай, кудалашып алгыла. Бирок анын тажрыйбасы жетишсиз. 25 жашында үч премьер-министрдин кеңешчиси болгон экен. Бул куракта эмне кеңеш берүү мүмкүн? Ал кагаз ташып жүргөн болсо керек… Өтө жаш адамдарды дайындоого болбойт. Өкмөт тажрыйба жүргүзүүчү орган эмес", — деди Масалиев.
Депутат ошондой эле мурдагы өкмөттүн мүчөлөрү кайда барарына кызыкты. Исаков алар тажрыйбалуу адамдар болгондуктан "көчөдө" калышпай турганын белгиледи.
