БИШКЕК, 25-авг. — Sputnik. Массачусетстеги Mercy медициналык борборунун кызматкери Мэвис Уончик Powerball лотереясынан АКШнын тарыхындагы эң ири сумманы 758 миллион доллар утуп алды. Бул тууралуу CNN телеканалы билдирди.
Бул АКШ тарыхында жалгыз бир киши утуп алган эң ири сумма.
Уончик аябай толкундангандыктан аны үйүнө кесиптеши коштоп барган. Ошол замат медайым мындан ары жумушка барбай турганын айткан.
Лотереяны саткан дүкөндүн ээси Боб Болдук ага бериле турчу 50 миң долларлык комиссияны кайрымдуулук уюмдарына которо турганын билдирди.
Уончик бардык сумманы албайт, себеби, анын 39,6 пайызы мамлекетке салык катары алынат. Эми медайым уткан акчаны 30 жыл ичинде аз-аздан же 480,5 миллион долларды дароо алса болот.
