Адистер жетишпегендиктен Балыкчыдагы ооруканада кезек күткөндөр көп болууда. Бул тууралуу Балыкчы шаарындагы Үй-бүлөлүк дарыгерлер борборунун жетекчиси Дамира Мусабаева Sputnik Кыргызстан агенттигинин кабарчысына билдирди.
Белгилей кетсек, аталган ооруканада таң атпай учу-кыйыры көрүнбөгөн кезек экенин окурмандар маалымдашкан.
"Учурда үй-бүлөлүк дарыгерлер борборуна 25 адис жетишпейт. Окуусун бүткөн жаш кадрлар элет жерине келбейт. Анткени маяна болгону 5000 сомду түзөт. Келсе дагы жатаканалары жок. Мындай көрүнүш Балыкчы шаарында гана эмес, республиканын бардык аймактарында кездешет. Ушундан улам кезек көп болууда", — деди Мусабаева.
Ал көз, мурун, кулакты караган дарыгерлер жаз, күз мезгилдеринде аскердик комиссариатка чакырылып, аптасына 2-3 жолу ал жакка барып турарын кошумчалады.
