БИШКЕК, 23-авг. — Sputnik. Жүк ташуучу унаанын айдоочусу суу майды Бишкектин бир нече көчөлөрүнө төгүп алганын социалдык тармактын колдонуучусу Altynbek Bialiev билдирди.
"Айдоочу өзүнүн шалаакылыгынан улам суу майды Юнусалиев көчөсүнөн Түштүк магистралга чейин төгүп алган. Жолдун сыйгалагынан улам жол кырсыгына кабылсаңыздар жүк ташуучу унаанын ээсине карата арыз жазгыла", — деп Биялиев жазып чыкты.
Дагы бир Ольга Александровна аттуу интернет колдонуучу видео жарыялады. Анда Орто-Сай базарынын аймагындагы жолго суюктук төгүлгөнүн, унаалар тайгаланып жатканын көрүүгө болот.
Бишкек шаардык Кайгуул милициясы Sputnik Кыргызстан агенттигинин кабарчысына бул маалыматты ырастады.
Учурда жол кырсыктары боюнча административдик протоколдор түзүлүүдө.
Ал эми "Тазалык" ишканасы жолдор тазаланып жатканын билдирди.
