БИШКЕК, 23-авг. — Sputnik. Маданият, маалымат жана туризм министрлиги Кыргызстандын туроператорлор ассоциациясы менен биргеликте Kyrgyz Tourism Awards улуттук конкурсун өткөрөт. Бул тууралуу министрликтин маалымат кызматы билдирди.
Конкурска туристтик компаниялар, операторлор, мейманкана жаатында иш алып баргандар, санаторий-курорттук мекемелер, туризм тармагындагы инновациялык долбоорлордун жетекчилери, Кыргызстандагы чет элдик мамлекеттердин дипломатиялык өкүлчүлүктөрү, жалпыга маалымдоо каражаттары, гиддер, фотографтар катыша алат. Алар 2016-жылдын 27-сентябрынан 2017-жылдын 15-сентябрына чейин аткарган эмгегин сунушташы кажет.
Конкурстун максаты Кыргызстанда туризмди өнүктүрүүгө багытталган кызыктуу жана өзгөчөлөнгөн долбоорлорду аныктоо болуп эсептелет.
Катышуучулардын эмгегин калыс кароо үчүн департамент тарабынан баалоочу компания түзүлдү.
Kyrgyz Tourism Awards улуттук сыйлыгы 17 номинация боюнча тапшырылат. Алар:
- Мыкты инновациялык долбоор;
- Кыргызстанда туризм тармагындагы мыкты окуялуу долбоор (фестиваль, конкурс, концерт, карнавал, спектакль жана башкалар);
- Кыргызстандын мыкты туроператору;
- Кыргызстандагы мыкты конок үйү;
- Кыргызстандагы мыкты мейманкана;
- Кыргызстандын туризм тармагындагы мыкты туристтик комплекс;
- Кыргызстанда туризмди өнүктүрүү боюнча мыкты интернет долбоор (сайттар, интернет-портал, социалдык баракчалар, блогдор жана башка);
- Кыргызстанда туризмди өнүктүрүү боюнча мыкты идея (көргөзмө, семинар);
- Туризмди өнүктүрүү боюнча Кыргызстандагы мыкты чет элдик өкүлчүлүк;
- Кыргызстандагы туризм жаатындагы мыкты окуу жайы;
- Кыргызстанда туризмди өнүктүрүүдөгү мыкты аймак;
- Кыргызстандагы туризмди мыкты чагылдырган ЖМК;
- Туризм тармагындагы мыкты эксперт;
- Кыргызстандын мыкты гиди;
- Туризм тармагындагы мыкты сүрөтчү;
- Кыргызстандын мыкты санаторий-курорту;
- Кыргызстандагы мыкты боз үй шаарчасы.
Жеңүүчүлөргө диплом, статуэтка жана сертификаттар тапшырылат.
Кызыкдар тараптар толук маалыматты департаменттин сайтынан алса болот.
