БИШКЕК, 21-авг. — Sputnik. Кытай элчилиги студенттик виза алууну каалагандардан документ кабыл алуу мөөнөтү узартылганын Кыргызстандын Тышкы иштер министрлиги билдирди.
Былтыр 30-август күнү болгон терактыдан кийин элчилик виза берүүнү убактылуу токтоткон. Анда жардыруудан документ жасоочу аппарат жабыркап, Кытайда окуган Кыргызстандын 300 студенти билим алуусун уланта албай калган. Ушул айдын башында тараптар 14-августтан 15-сентябрга чейин дүйшөмбү, шаршемби жана жума күндөрү саат 15.00дөн 16.00гө чейин документ тапшырууга уруксат берүү боюнча макулдашылган.
"Виза алууну каалагандардын көптүгүнөн улам жума күнү тараптар кайрадан жолугушту. Кытай элчилиги кыргызстандык студенттердин өз маалында билим алуусу зарылдыгын түшүнүү менен кабыл алып, алардын окуу жылы башталгыча виза алуусуна көмөктөшмөй болду", — деп айтылат билдирүүдө.
"Бишкектеги элчиликке кыргызстандыктар 21-августтан 15-сентярга чейин дүйшөмбү, шейшемби, шаршемби жана бейшемби күндөрү саат 9.00дөн 12.00гө чейин документ тапшыра алат. Аталган график Кытайда окуй тургандарга гана тиешелүү", — деп маалымдады ТИМ.
Эскертүү: 22-августта элчиликтин консулдук бөлүмү виза документтерин саат 15.00дөн 17.00гө чейин, ал эми калган күндөрү жогоруда көрсөтүлгөн убакытта кабыл алат.
