БИШКЕК. 21-авг. — Sputnik. Режиссер Актан Арым Кубаттын "Кентавр" фильми Хельсинкидеги (Финляндия) XXX эл аралык кинофестивалда көрсөтүлөт. Бул туурасында тасманын сопродюсери Алтынай Койчуманова билдирди.
Финляндиялыктар "Кентаврды" 14-24-сентябрда көрө алышат.
"Сүйүү жана Анархия" деп аталган кино фестиваль Хельсинки шаарында 1988-жылы түптөлгөн. Ал жаңычылдык багытта жана жаңы ыкмада тартылган кино картиналарды көрсөтүп келет. Ал жерде тажрыйбалуу кинорежиссерлор менен кошо эле жаштар да өз эмгектерин катыштыра алат.
Кинофестивалга катышып жаткан фильмдер Хельсинкинин 17 кинотеатрында көрсөтүлмөкчү. Таратылган маалыматта былтыр бул кино майрамга 59 000 адам келгендиги айтылган.
Буга чейин "Кентавр" бир канча ири кинофестивалдарга катышып, бир нече ирет байгелүү орундарга татыган.
"Кентавр" — өз элинин улуттук баалуулуктарынын сакталып калышына жан үрөгөн адам тууралуу тасма.
