Буга байланыштуу журналист Гүлдана Талантбекова спортчу тууралуу 9 факты даярдады.
Үй-бүлөсү. Атасы жеке ишкер, апасы эсепчи кызматын аркалап, учурда пенсияда. Жети бир тууган. Үч агасы, эжеси жана эки иниси бар. Үй-бүлөсү спортко жакын. Атасы жаштар курама командасында баскетболчу болгон.
Колу "Коконго", буту "Букарага" жеткен Оңолбек. Мектепте окуп жүргөндө кичинекей, толук бала болгон. 10-классынан тарта бою өсө баштаган. Учурда бою 1 метр 96 сантиметр, салмагы 96 киллограмм.
Спортко карай жол. Медициналык академиянын травматология бөлүмүндө окуп жүргөндө айылдаш байкеси "Жаңы Муун" командасына чакырган. Ал жактан машыгып жүрүп бир жылдан кийин эле жыйынтык көрсөтө баштаган.
Медик спортчу. Учурда ал клиникалык ординатурада окуйт. Анын "медицина багытында билим алганым деле жакшы болуптур, анатомиядан түшүнүк мыкты. Спортто балдарга кеңеш берип турам" деп айтканы бар. Келечекте спорттук медицина менен алектенүүнү каалайт.
Тармал чач. Студент кезинде достору корей сериалындагы каармандын атынан "Гу Жун Пе" деп чакырышчу. Өзү "чачымды бир аз өстүрүп койсом эле кайрыла баштайт" деп калат.
Жетишкендиктери. 2015-жылы КРдин волейбол федерациясынын версиясы боюнча мыкты волейболчу деп табылган. Ошол эле жылы "Sports Awards-2015" сыйлыгынын "Мыкты волейболчу" наамына татыган.
2016-жылы "Жаңы муун" командасынын курамында өлкө чемпиондугунда 2-орунду ээлеп, Ысык-Көл оюндарында жана Республикалык спартакиадада алтын медалды багындырган. 2017-жылы Кыргыз өкмөтүнүн ардак грамотасы менен сыйланган.
