БИШКЕК, 16-авг. — Sputnik. UEFA уюмунун версиясы боюнча жылдын мыкты футболчусу наамына үч талапкер аныкталды. Бул тууралуу аталган уюмдун сайтында кабарланды.
Андагы маалыматка ылайык, тизмеге "Реалдын" чабуулчусу Криштиану Роналду, "Барсанын" оюнчусу Лионель Месси жана "Ювентустун" дарбазачысы Жанлуиджи Буффон кирди.
Аталган футболчуларды 80 клубдун машыктыруучуларынан жана 55 журналисттен турган атайын калыстар тобу тандаган.
Добуш берүү учурунда үч футболчу менен кошо алдыңкы ондукка Лука Модрич, Тони Кроос, Пауло Дибала, Серхио Рамос, Килиан Мбаппе, Роберт Левандовски, Златан Ибрагимовичтер кирген.
Мындан сырткары, мыкты футболчу кыз наамына дагы талапкерлер аныкталды. Алар: Пернилле Хардер, Женифер Марожан жана Лике Мартенс.
Мыктылар 24-август күнү аныкталат.
