БИШКЕК, 15-авг. — Sputnik. Мамэкотехинспекциянын кызматкерлери тарабынан Жалал-Абад шаарынын базарларында өрткө каршы жана алдын алуу боюнча атайын машыгуу өткөрүлдү. Бул тууралуу аталган ведомствоунун маалымат кызматы билдирди.
Машыгуулар Жалал-Абад шаарынын борбордук базары, "Мадумар-Ата", "Тору", "Айгүл", "Аль-Мадина" жана "Береке" базарларында өткөрүлдү.
"Иш-чаранын жүрүшүндө атайын унаалардын базарларга кирип чыгуусуна олуттуу тоскоолдуктар жаралды, себеби сатуучулар соода күркөлөрүн башаламан орнотуп алышкан. Аларга инспекторлор тарабынан күркөлөрдү жылдыруу боюнча түшүндүрүү иштери жүргүзүлдү. Ал эми базар ээлерине аныкталган кемчиликтерди жоюу боюнча эскертүүлөр берилди. Бир айлык мөөнөттө белгиленген мүчүлүштүктөр жокко чыгарылбаса, мыйзам чегинде чаралар көрүлөт", — деп айтылат маалыматта.
Текшерүүгө инспекциянын Жалал-Абад шаары жана Сузак району боюнча аймактык башкармалыгы жана Жалал-Абад шаардык өрткө каршы кызматынын адистери катышкан.
