БИШКЕК, 8-авг. — Sputnik. Талас шаарынын милициясы жергиликтүү базардагы чөнтөкчүлөрдү кармады. Бул тууралуу ИИМдин маалымат кызматы билдирди.
Ага ылайык, август айынын башынан бери милицияга төрт жаран базардан акчасын уурдатканын айтып кайрылган.
Биринчи кайрылган жаран 21 800 сомун алдырганын айтса, бир сааттан кийин экинчи тургун кайрылып 20 600 сомун уурдатканын билдирген.
Милиция ыкчам иликтөө иштерин жүргүзүп, анын жыйынтыгында төрт кишиден турган топту кармаган. Колго түшкөндөрдүн бардыгы Талас районунун Талды-Булак айылынын тургундары экени аныкталган.
Аларга карата Кылмыш жаза кодексинин уурулук беренеси боюнча кылмыш иши козголуп, тергөө амалдары жүрүүдө.
