БИШКЕК, 30-июл. — Sputnik. Азербайжандын борбор калаасы Баку шаарындагы супермаркеттин кардары муздаткычта эс-учунан тангыча кармалып турган. Бул тууралуу Vesti.Az порталына таянуу менен РИА Новости агенттиги жазып чыкты.
Маалыматка ылайык, дүкөндүн администратору 37 жаштагы Фируз Гахраманов менен Новруз Садиевди устара уурдады деп күнөөлөп, 750 манат (114 доллар — ред.) талап кылган. Садиев үйгө акча алып келүүгө кетип, бирок бир аздан кийин тийиштүү сумма чогулбай калганын айтып телефон чалган.
"Администратор жана дүкөндүн коопсуздук кызматынын өкүлдөрү Гахрамановду күч колдонуп муздатуучу камерага тыгып салышкан. Ал жерде кардар эс-учунан тангыча кармалып, түн ортосунда гана үйүнө кое берилген", — деп жазылат маалыматта.
Гахраманов учурда укук коргоо органдарына кайрылганын билдирди.
