БИШКЕК, 7-авг. — Sputnik. Такси кызматкерлери жол кырсыктан жабыркагандарга биринчи медициналык жардам көрсөтүүнү үйрөнүшөт. Бул тууралуу Кызыл жарым ай коомунун маалымат кызматы кабарлады.
Билдирмеге караганда, жол кырсыгынан жабыркаган адамдарга тез жардам көрсөтүлсө жашап кетүү мүмкүнчүлүгү жогору болот.
"Жыл башынан бери өлкөдө жол кырсыгынан 343 адам көз жумган. Жабыркагандарга күбөлөр биринчи жардам көрсөтө калса, аларда жашап кетүү мүмкүнчүлүгү жогору болот. Андыктан такси кызматкерлери дайыма жолдо болгондуктан аларга медициналык жардам көрсөтүүнү үйрөтүп коюу ашыкча болбойт. Учурда таксисттерге аталган коомдун тренерлери тарабынан алгачкы сабактар өтүлө баштады. Анда алар жол кырсыгынан жабыркагандарды унаадан алып чыгуу, жасалма дем алдыруу сыяктуу ыкмаларды үйрөнүшүүдө", — деп жазылат маалыматта.
Ошондой эле аталган уюмдан жакын арада бардык такси кызматтарына сабактар өтүлөрүн кошумчалашты.
