БИШКЕК, 7-авг. — Sputnik. Россиянын Воронеж облусундагы Лискинский районунда ата мекенди коргоочулардын улуттар аралык күнү жана Советтер союзунун баатыры Чолпонбай Түлөбердиевдин 75 жылдыгына арналган элдин достук күнү белгиленди. Бул тууралуу Кыргызстандын Россиядагы элчилиги билдирди.
Маалыматка ылайык, бул иш-чара 6-августта өтүп, Лискинский райадминистрациясы, Воронеждеги кыргыздардын "Мурас" коому, профсоюз уюму жана шаардын ардагерлер кеңеши тарабынан уюштурулган.
"Салтанатка Кыргызстандын Россиядагы элчилигинин делегациясы, КРдин Воронеж облусундагы консулу, Ростов, Курск, Белгород, Тамбов жана Москва шаарындагы кыргыз диаспорасынын өкүлдөрү катышты", — деп жазылат маалыматта.
Кыргызстандын делегациясы Түлөбердиевдин бейитине гүл коюп, музейине барды.
Белгилей кетсек, Лискинский районунда Советтер союзунун баатыры Чолпонбай Түлөбердиевге эки айкел коюлган. Андан сырткары, баатырдын наамы Давыдовка айылы менен Нововоронеж шаарындагы мектепке ыйгарылса, Лиски шаарындагы жолго аты берилген.
