Ал мурда минтип чыгармачылык чөйрөгө аралашып калам деп ойлогон эмес. Андыктан ата-энесинин сунушу менен Бишкек политехникалык университетинин гидроэнергетика факультетине тапшырып калган.
"Жүрөгүң менен каалап жасаган нерсе хобби, эгер көңүлүңө жакпаган жумуштарды жасасаң "халтура" деп аталат экен. Мен гидроэнергетика тармагын "халтура" дээр элем. Анткени ал нерсе мага жакын эмес, шыгым да жок. Мектепти бүткөндөн кийин эч жакка тапшыргым келбей жүргөм. Апам "кыз балага минтип жүргөн болбойт. Быйыл тапшырбасаң кийинки жылы такыр окугуң келбей калат" деп ошол жакка тапшыртып койгон. Кийин гана кино, клиптерге чакыруу түшө баштады", — деди Айдарова.
Ошондой эле ал тасмаларга тартылуу учурунда сабактарды көп калтыра бергендиктен 1-курсту бүткөндөн кийин окуусун токтотуп койгонун жана актердук чеберчилигин өркүндөтүү үчүн ушул жылы Бүбүсара Бейшеналиева атындагы Искусство университетине тапшырууну пландап жатканын билдирди.
