БИШКЕК, 29-июл. — Sputnik. Режиссер Актан Арым Кубаттын "Кентавр" тасмасы Астана шаарында өткөн "Евразия" Эл аралык кинофестивалында эки сыйлыкка ээ болгондугуну продюсер Алтынай Койчуманова билдирди.
Маалыматка караганда, фильм "Эң мыкты режиссерлук иш" жана "НЕТПАК" (Азия киносун жайылтуу боюнча эл аралык тармактын атайын байгеси) сыйлыктарына татыды.
"Евразия" Эл аралык кинофестивалы — Борбордук Азиянын ири кинофоруму. Негизги максаты — Казакстандагы кино жаатын өнүктүрүү жана Азия менен Европанын ортосундагы кызматташууну жакшыртуу.
Аталган фестиваль биринчи жолу 1998-жылы өткөрүлүп, анда Актан Арым Кубаттын "Бешкемпир" тасмасы баш байгеге ээ болгон.
"Кентавр" — өз элинин улуттук баалуулуктарынын сакталып калышына жан үрөгөн адам тууралуу тасма.
