БИШКЕК, 24-июл. — Sputnik. Ноокен районундагы эки айылды Өзбекстан менен чектешкен чек арадан 50 метр артка жылдыруу аракеттери көрүлүп жатат. Бул тууралуу аймактык кабарчы Мамлекеттик чек ара кызматынын Жалал-Абад облусу боюнча башкармалыгынын башчысынын орун басары Таалайбек Тажибаевге шилтеме берип кабарлады.
Маалыматка караганда, Кыргызстандын жоокерлери жүрүүчү жолго бир гана унаа батат. Мындай көрүнүш аскерлердин чек араны коргоосуна жолтоо болууда. Буга байланыштуу айылдарды артка жылдыруу муктаждыгы келип чыккан.
"Өзбекстан тарап өз чек арасынын аймагындагы 35 үйдөгү жай тургундарды көчүрүп, чек араны зым менен тоскон. Учурда ар төрт саат сайын чек арачылар келип кайтарып турушат. Ал эми Кыргызстандын 2004-жылдан бери айылдарды 50 метр артка жылдыруу аракетинен майнап чыкпай келет", — деди Тажибаев.
Ал ошондой эле учурда Чек айылынан 32, Бостон айылынан 22 үй-бүлөнү көчүрүү үчүн жергиликтүү бийлик айыл аралап түшүндүрүү иштерин жүргүзүп жатканын кошумчалады.
"Бул жерге көнүп калгандыктан кеткибиз келбей жатат. Башка жактан жер берилген күндө деле ал жакка үй салып көнүп кетүү кыйынга турат. Бирок бир нече жылдан бери эле жыласыңар деп айтып келишкендиктен, үй-жайды оңдоодон да тартынып калдык", — деди Кожобеков.
Ал эми Момбеков айыл өкмөтүнүн жер адиси Бекназар Раманкуловдун айтымында, элди көчүрүү үчүн атайын жер тилкеси даярдалып жатканы менен компенсация төлөө маселеси так чечиле элек.
