БИШКЕК, 24-июл. — Sputnik. Кыргызстандын президенти Алмазбек Атамбаев АКШны демократтар башкарып турган маалдагы Мамлекеттик департаменттин саясатын сынга алды. Бул тууралуу өлкө башчы Чолпон-Атада өтүп жаткан маалымат жыйында айтты.
"Эсиңиздерде барбы, 2014-жылы маркум Ислам Абдуганиевич (Өзбекстандын президенти — ред.) аймакта суу үчүн согуш чыгышы мүмкүндүгүн айткан. Ошол эле жылдын аягында Өзбекстан ар бири миллион доллар турган 328 сооттолгон унаа алган. Мына, демократия, демократтардын сөзү ушул. Мен "эгер силер чыныгы демократ болсоңор, эмнеге бизге берген жоксуңар?" деп сурадым", — деди президент.
Барак Обама Демократиялык партиядан келген АКШнын 15-президенти болчу. Учурда Американы Республикалык партиянын өкүлү Дональд Трамп башкарууда.
