БИШКЕК, 24-июл. — Sputnik. Кыргызстандын президенти Алмазбек Атамбаев Аскар Акаевди эч качан кечирбей турганын Чолпон-Ата шаарында өткөн маалымат жыйында билдирди.
Иш-чарада журналисттер тарабынан 2010-жылдын 7-апрелиндеги окуя боюнча соттолгондорго карата мунапыс жарыялоо мүмкүндүгү тууралуу суроо берилген.
"Жаныш Бакиев боюнча айтсам, бизде аны издеп таап жазалоо үчүн МОССАД сыяктуу чалгын кызматы жок экени өкүндүрөт. Апрель окуясына чейин да, андан кийин да канча деген кишинин өмүрүнө забын болду, миллиондогон акчаларды уурдады! Акаевди да кечирели деп айтып келишет. "Кумтөрдө" 67 пайыз үлүшүбүз жана миң тонна алтыныбыз бар эле. Жүрүп отуруп компаниядагы үлүшүбүз 16 пайызга чейин төмөндөп кетти. Мен Акаевди эч убакта кечирбейм: алдым-жуттум үй-бүлөсүнүн кызыкчылыгы үчүн миң тоннага чукул алтынды бөтөн кишиге кармата берди. "Жер-Үйдү" деле алалы. Акаев да 300 сомго лицензия сатып келген, Бакиевдер да Березовский менен ага жакын кишилерден бир топ эле акча алып турган", — деди Атамбаев.
Президент "Жер-Үйдү" иштете турган россиялык компанияга ага чейин инвестор болгон "Визор" казак компаниясынын карызын жабуу үчүн 100 миллион доллар берүүгө туура келгенин белгиледи. Өлкө башчы мамлекет менен элге кыянаттык кылган адамдарды кечирүүгө болбой турганын кошумчалады.
