БИШКЕК, 24-июл. — Sputnik. Көп жылдан бери токтоп турган "Айдаркен" сымап комбинатынын өндүрүш иши жанданат. Бул тууралуу аталган ишкананын директору Толубай Салиев билдирди.
Анын айтымында, ишканага ата мекендик компания акча салууда.
"2009-жылы шахталарды суу каптап, комбинат ишин токтотууга мажбур болгон. Ошондон бери бизнес долбоорлорду жазып инвестор издеп келгенбиз. Быйыл май айында "Север Сталь" ЖЧКсы келип таанышып кеткен. Ал эми 14-июлда эки тараптуу келишимге кол коюлду", — деди ишкана директору.
"Айдаркен" сымап комбинаты 1941-жылы Украинадан шашылыш түрдө көчүрүп келинген. Кийин ал дүйнөдөгү сымап өндүрүүчү ири комбинатка айланган. Бирок 1990-жылы мамлекет тарабынан каржылоо токтоп, ишкана ПЕСАК программасына киргизилген.
Белгилей кетсек, Айдаркендин аймагында 45 жылга жете турган сымаптын кору бар.
