БИШКЕК, 19-июл. — Sputnik. 20-июлда Бишкекте өтө турчу Алтай цивилизациясы боюнча эл аралык форумга Татарстан менен Башкыртстандын президенттери Рустам Минниханов менен Рустем Хамитов катышуусу мүмкүн экенин КР президентинин маалымат кызматы билдирди.
Аталган форум 20-июлда Бишкек шаарында башталат. 21-июлда Ысык-Көлдөгү Чоң-Сары-Ой айылында "Алтай көчү" экспозициясы ачылат. Анда 30 боз үй тигилип алтай тектүү элдин (кыргыз, казак, татар, башкыр, уйгур жана башкалар) жашоо турмушу чагылдырылат. Аталган экспозиция 31-агустка чейин уланат.
Иш-чара 23-июлга чейин Чолпон-Ата шаарында уланып, анда окумуштуулар өз эмгектерин кеңири талкууга коёт. Ошондой эле "Алтай цивилизациясы: өткөнү, учуру, келечеги" аттуу кереге кеңеш болот.
Форумга 100дөн ашык тарыхчы, археолог, этнограф, антрополог, лингвист, фольклор жана искусство изилдөөчүлөрү катышат.
