БИШКЕК, 19-июл. — Sputnik. Борбор калаадагы Ленин райондук соту Бишкек шаарынан эки окуучуну коюп кеткен айдоочуну сегиз жылга эркинен ажыратты.
Айыпталуучу Кылмыш жаза кодексинин 281-беренесинин 2чи, 4чү жана 5чи бөлүктөрү менен күнөөлүү деп табылды. Ал ошондой эле 3 жылга айдоочулук күбөлгүнөн ажыратылды. Айыпталуучу шаардык сотко кайрылууга укуктуу.
Айдоочу бир нече сааттан кийин кармалып, анын мас абалда болгону аныкталган.
Дагы бир белгилей кетчү жагдай, шектелүүчүнү суракка алуу маалында Бишкек шаардык Кайгуул милициясынын издөө бөлүмүнүн жетекчиси Ажыбек Майназаров бул адам мындан эки жыл мурун адам өлүмү менен аяктаган жол кырсыгынын күнөөкөрү болушу мүмкүндүгүн айткан.
"Мен аны дароо эле тааныдым. 2015-жылы бул адамды издөөгө катышкам. Анда бир адамды өлтүрө сүзгөн. Бирок каза болгон адамдын туугандары муну кечиришкен. Бул адам насыя алып, өлүмдүн бардык чыгымын көтөрүп берген. Азыр болсо насыядан кутулуш үчүн ошол эле адамдарга иштээри белгилүү болду", — деген анда Майназаров.
Ал эми бүгүнкү сот отурумунда соттолуучу жабырлануучу тараптын жактоочусунун мурда жол кырсыгына катыштыгы бар-жогун сураганда, бир нече жыл мурда жолго чуркап чыккан мас адамды кагып алганы чын экенин билдирди.
