БИШКЕК, 19-июл. — Sputnik. Казакстандын Мангистау облусунда атышуу болуп, анын кесепетинен алты киши жаракат алган. Шектүүлөр кармалганын Sputnik Казакстан агенттиги жазып чыкты.
Алдын ала маалымат боюнча 19-20 жаштагылар мушташып, кийин өздөрүнөн улууларды дагы чакырышкан. 10-15тей бала айылдын чекесине чыгып, атышууга чейин барышкан.
"Мушташка катышкандардын бири мергенчи мылтыгын алып чыгып, эки жолу ок чыгарган. Анын кесепетинен алты киши түрдүү жаракаттарды алган", — деген пикирин Мангистау облустук милициясынын криминалдык башкармалыгынын жетекчиси Алтынбек Калиев билдирди.
Анын айтымында, учурда мушташка катышкандардын баары кармалып, кылмыштын бети ачылган. Алар мылтык колдонуп бейбаштык кылуу жана адам өлтүрүүгө аракет кылуу беренелери боюнча айыпталууда.
