Жашыл гүлдөй жайкалып, айылды сонун түрлөнткөн. Ак жибектей буралып, балапандай тең өскөн. Басканы сонун маралдай, Биздин Ала-Тоонун кыздары ай деп акындар кыздарга болгон сезимдерин ырга салып жеткирген. Дегеним соңку убактарда сулууларды көз талдырбай эле көрүп жатабыз. Эс ала албай дагы калдык. Минтип баары ачык эле көрө берип жогорудагыдай сезим ырлары жаралбай калбаса эле болду.
Чырайлуу келин. Бишкектеги ресторандардын биринде өткөн Кыргызстандын сулуу келини сынагына 24 айым катышты. Подиумдагы сулуу келиндерди бул жерден көрүңүз.
Экинчиси жаш сулуу. Сулууларга суктанып бүтө албайм калдым дегендерге дагы бир сулуулардын сынагы өттү. Ага 19 бийкеч катышып Айгерим Бектенбаева Кыргызстан чүрөгү аталды.
Эрдик кылууну үйрөнүп алыңыз. Баса, суктанып эле отура бербей сууга чөгүп кеткен кишини кантип куткаруу керектигин билип алганыңыз ашыктык кылбайт.
Суктанганга сулуулар аз десеңиз илбирс менен үйдө багылган чаарчыкты көрүп суктаныңыз.
Айрыкча унаа айдап баратканда телефонду тээ алыс эле коюп коюңуздарчы айымдар. Чехияда Фейсбукка түз эфир жасап жаткан кыздар жол кырсыгына кабылды.
Шумдугуң кур! Казакстанда баласы мектеп босогосун аттаганы үчүн "алтын чапан" кийген жоокерлер "алтын тактыга" көтөрүп чыгып чоң той берген. Эми ал бала мектепти бүткөндө кандай той болот элестетип көрүңүз.
Биз алгачкы олимпиада чемпионун да "алтын такка" көтөрө элекпиз. 1980-жылы Москвада өткөн олимпиадада алтын медаль тагынган, оор атлетика боюнча дүйнөнүн 4, Европанын 2 жолку чемпиону болгон Каныбек Осмоналиев менен болгон маекти бул жактан окуңуздар.
Селдин кесепети. Бурадардын аягы ушундай жакшы маанай менен эле бүтүшүн каалагам. Тилекке каршы табигый кырсыктар да катталып кетти. Аймактардагы селдин кесепетинен бир топ турак үй, айдоо жерлери да жараксыз калган. Ал эми Аравандын Кичи-Алай айылынын тургуну селден кантип качып чыгышканын айтып берди.
Тилсиз жоодон жаракат алган мекендештер. Москванын "РИО" соода оюн-зоок борборунда чыккан өрттөн эки кыргызстандык жабыркап, абалы оор делүүдө.
Бүгүн Бишкекте көптөн күткөн жамгыр жаай турганын Кыргызгидрометтен билдирди.
Валюта наркы. Сомдун баасы долларга карата орто эсеп менен 69.48 (сатып алуу) жана 69.73 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгү бензин 38.00 сом, АИ-95 үлгүсүндөгүсү 41.20 сом, ал эми дизель майы 35.70 сомдон сатылууда.
Соңку сөз. Жамандыкты амандык жеңет!
Баарыңыздарга ийгилик каалап Эламан Карымшаков
