Ички туризмди өнүктүрүү үчүн элдин социалдык-экономикалык абалын жакшыртуу керек. Бул тууралуу Sputnik Кыргызстан агенттигине Кыргыз туроператорлор бирикмесинин президенти Асылбек Ражиев билдирди.
Анын айтымында, өлкө аймагын кыдырып саякаттоого сөзсүз каражат талап кылынат.
"Акыркы беш жылдан бери өлкөдөгү жалпы эле туризм тармагы жандана баштады. Чет элдик туристтер сыяктуу өлкө жарандары айрыкча шаардык жаштар эко туризмге кызыгып тоолорду, жайлоолорду жөө, ат менен кыдырууга кызыга баштады. Мындан сырткары кымыз, кышкы туризм да өз ордун таап, бул жаатта атайын шарттар жакшырууда", — деди Ражиев.
Мындан сырткары, Ражиев ички туризмди өнүктүрүүдө өлкөдөгү инфраструктураны оңдоп, тиешелүү шарттарды түзүп, тейлөө тармагын жакшыртуу керектигин кошумчалап кетти.
