БИШКЕК, 11-июл. — Sputnik. Президент Алмазбек Атамбаев Миссисипиде аскер учагынын кыйрашына байланыштуу АКШнын президенти Дональд Трампка көңүл айтты. Бул тууралуу өлкө башчынын маалымат кызматы билдирди.
Эске салсак, Миссисипиде С-130 үлгүсүндөгү аскер учагы кулап, кеминде эле 16 кишинин өмүрүн алган. Айрым маалыматтар боюнча учак ок-дарыларды ташып бараткан.
"Миссисипиде аскердик учактын кыйрашынан улам адамдар каза тапкандыгы тууралуу кабарды терең кайгыруу менен кабыл алдым", — деп жазылат мамлекет башчысынын көңүл айткан телеграммасында.
Атамбаев ошондой эле Кыргызстан элинин атынан жана жеке өзүнүн атынан каза болгондордун туугандарына жана жакындарына терең кайгыруу менен кайрат айтарын баса белгилеген.
