Бейшемби күнгө карата Борбордук шайлоо комиссиясына 10 талапкердин документтери келип түштү
БИШКЕК, 29-июн. — Sputnik. Борбордук шайлоо комиссиясына дагы үч президенттикке талапкердин документтери келип түштү. Бул тууралуу БШКнын маалымат кызматынан билдиришти.
Коопсуздук маселелери боюнча эл аралык эксперт Таалат Масадыков
Өзүн-өзү көрсөтүү жолу менен президенттик жарышка аттануу тууралуу арызы менен Жогорку Кеңештин өткөн чакырылыштагы депутаты Турсунбай Бакир уулу кайрылган. Ошондой эле өзүн-өзү көрсөткөн талапкерлердин катарын коопсуздук маселелери боюнча эл аралык эксперт Таалат Масадыков толуктады.
Үчүнчү арыз "Өнүгүү — Прогресс" партиясынан келип түшкөн. Анда президенттикке талапкер катары партия лидери Бакыт Төрөбаев көрсөтүлгөн. БШК документтерди кабыл алды.
Эми БШКда 10 жарандын арызы жатат. Алардын ичинен эки талапкерди партиялар көрсөткөн.
Шайлоо үстүбүздөгү жылдын 15-октябрында өткөрүлөт. Талапкерлерди көрсөтүү 1-августка чейин созулат.
