БИШКЕК, 28-июн. — Sputnik. Бишкек — Кара-Балта унаа жолун реконструкциялоо үчүн Кытайдан атайын техника алып келингени тууралуу Транспорт жана жолдор министрлигинин маалымат кызматынан билдиришти.
Башкы подрядчы Сhina Railway №5 Кыргызстанга ар кандай функцияларды аткарган 45 техниканы жеткирди. Реконструкция ишине бардыгы болуп 78 кызматкер тартылат. Анын 27си — чет өлкөлүк, 51и жергиликтүү элден алынат.
Жолду кеңейтүү үчүн жалпы жонунан үч миңге жакын бакты кыюуга туура келет, бүгүнкү күндө 20дан ашык дарак алынды. Алардын ордуна 4,3 миң көчөт отургузуу пландалып жатат.
Бишкек — Кара-Балта унаа жолу транспорттук коридорду жакшыртуу долбоорунун алкагында оңдолуп, узундугу 52,5 чакырымды түзөт.
Курулуш иштерин Азия өнүктүрүү банкы каржылоодо. Техникалык-экономикалык негиздеменин жыйынтыгы боюнча аталган банк 100 миллион доллар бөлгөн, анын 65 миллиону насыя болсо, 35 миллиону грант иретинде берилген. Ал эми кыргыз өкмөтү 28 миллион доллар караган.
