Жергиликтүү жашоочу Алла Кузнецова жарылуу унаа цистернасына газ толтуруп жаткан учурда болгонун айтат.
"Мен уйларыма чөп оруп жаткам. Анан эле ары жак жарылып жалыны мен тарапка жете түштү. Эл ызы-чуу түшүп сыртка чуркап чыкты. Эмне болду десек "газ күйүп жатат, ал жакка барбагыла" дешти. Адамдар ары-бери чуркап, күйүк алгандар ар жерде жатып калды. Эки жолу катуу жарылуу болуп, темир-тезектер асманга учуп кетти. Аябай корктук, мындайды биринчи көрүп жатабыз", — деди күбө.
Айыл тургуну Камила Сырдыбаеванын эки колунан күйүк алган күйөө баласы Нурбек Алимов жанаша жайгашкан май куюучу жайда иштечү.
Жарылуу болгон газ толтуруучу жайда Айдарбек Бейшекеевдин агасы Абдыбек Бейшекеев да иштеген. Окуя болгон учурда ал жумуш ордунда эле.
"Буга кимди күнөөлөштү деле билбейбиз. Коопсуздук чаралары көрүлбөгөндөн улам болду го. Жоопкерчиликсиз мамиленин айынан менин эле агам эмес, сегиз адам жабыркады. Агамдын денесинин 80 пайызы күйүп калыптыр", — деди Бейшеекев.
Ал эми Ысык-Көл райондук ооруканасынын башкы дарыгери Алмира Алдашева Sputnik Кыргызстан агенттигине кырсыктан жаракат алган адамдардын бешөө жандандыруу бөлүмүндө, экөө хирургия бөлүмүндө жатканын жана бирөөнүн колу гана күйгөндүктөн тиешелүү жардам алып үйүнө кеткендигин билдирди.
Эскерте кетсек, кечээ 19-июнда болжол менен саат 17.22лерде Ананьево айылынын Совет көчөсүндө май куюучу жайдын жанынан газ баллондор жарылган. Мындан эки адам каза таап, 8 адам ооруканага жеткирилген. Кийинчерээк каза болгондор 52 жаштагы эркек киши жана анын 10 жаштагы баласы экени белгилүү болду.
Премьер-министр Сооронбай Жээнбеков кырсыктын себептерин тактап, өлкө аймагындагы май куюучу жайлардын текшерүүнү тапшырган.
