БИШКЕК, 19-июн. — Sputnik. Бүгүн Жалал-Абад шаардык кеңешинин депутаттарына мандат берилди. Эми он төрт күн ичинде шаардык кеңеш алгачкы сессиясына чогулууга тийиш. Мындай маалыматты БШКнын аймактык өкүлү Дамир Жүндүбаев аймактык кабарчыга билдирди.
Анын айтымында, 28-май күнү өткөн шайлоодо жеңишке жетишкен "Өнүгүү-Прогресс" фракциясы тогуз мандат, КСДП 8, "Кыргызстан" 3, "Ата-Журт" менен "Мекеним Кыргызстан" фракциялары төрттөн мандатка ээ болушту.
"КСДП, "Республика", "Кыргызстан" жана "Мекеним Кыргызстан" фракциялары биригип "Жаңы багыт" көпчүлүк коалициясын түзүштү. Ал эми "Өнүгүү-Прогресс" менен "Ата-Журт" азчылыкта калды", — деди Жүндүбаев.
Эскерте кетсек, былтыркы жылдын соңунда өткөн шайлоодон Жалал-Абад шаардык кеңешке келген депутаттар ич ара келише албай, 2017-жылдын март айында тарап кетишкен. Анын айтынан шаардын бюджети бекитилбей, мэр шайланбай калган.
