БИШКЕК, 15-июн. — Sputnik. Ички иштер министрлигинин 10-Башкы башкармалыгы тарабынан мыйзамсыз түрдө виза алууга аракеттенген жаран кармалды. Бул тууралуу ИИМдин маалымат кызматынан кабарлашты.
Билдирмеге ылайык, Кыргызстандагы дипломатиялык өкүлчүлүктөрдүн бирине эмгек визасын алуу үчүн кайрылган жаран соттолбогону тууралуу жана окуган жеринен берилген жасалма маалым катты алып келген. Мындан улам маалым кат экспертизага жиберилип, мыйзамсыз жасалганы белгилүү болгон.
Оперативдүү издөө иштеринин жүрүшүндө жасалма виза алууга аракеттенген киши кармалып, ал Кыргызстандын 30 жаштагы жараны экени аныкталган.
Аталган факт боюнча кылмыш иши козголуп, териштирүү жүрүп жатат.
