БИШКЕК, 15-июн. — Sputnik. Мамлекеттик каттоо кызматынын жетекчиси Тайырбек Сарпашев жумушунан бошотулганын өкмөттүн маалымат кызматынан кабарлашты.
Билдирмеге караганда Сарпашев кызматтан кетүү тууралуу арызын өз эрки менен жазып, тиешелүү буйрукка пермьер-министр Сооронбай Жээнбеков кол койгон.
Белгилей кетсек, Башкы прокуратура Мамлекеттик каттоо кызматынын жетекчиси Тайырбек Сарпашевди Максим Бакиевдин ишенимдүү адамы Ульяна Пакка тиешелүү кыймылсыз мүлктү камактан чыгарууга буйрук берген деп айыптап, аны кызмат ордунан алуу боюнча өкмөт башчыга сунуш жөнөткөн.
Прокуратура Сарпашевге Максим Бакиевдин жана анын жакындарынын мүлкүн конфискациялоо боюнча маселе элдин көңүл чордонунда экенин билип туруп, Бишкек мамлекеттик каттоо кызматына түз буйрук бергенин да баса белгилеген.
