БИШКЕК, 5-июн. — Sputnik. Эл өкүлү Өмүрбек Текебаевдин жактоочулары сотко президент Алмазбек Атамбаевди чакыруу талабын коюп, ага өлкө башчы дагы убактылуу өкмөттө иштегендиктен бере турчу жооптору бар экенин жүйө келтиришти.
Өз кезегинде Текебаев чакырыла турчу көптөгөн кошумча күбөлөр бар экенин айтып, жактоочу аларды атагандан кийин күбө болчулар залдан чыгарылган.
Мамлекеттик айыптоочу президенттин буга эч кандай тиешеси жок экенин белгилеп, жактоочулардын өтүнүчүнө каршы экенин билдирди. Ал эми судья чакырылчу күбөлөр көп экенин айтып, маселе ачык бойдон калды.
Эскерте кетсек, учурда Биринчи Май райондук сотунда "Ата Мекен" фракциясынын лидери Өмүрбек Текебаев менен экс-элчи Дүйшөнкул Чотоновдун иши каралып жатат.
