БИШКЕК, 5-июн. — Sputnik. Бүгүн Биринчи Май райондук сотунда Өмүрбек Текебаев менен Дүйшөнкул Чотоновдун соту башталды.
Учурда сот имаратынын алдына Текебаевдин тарапташтары чогулууда. Алар менен чогуу эл өкүлдөрү Садык Шер-Нияз, Алмамбет Шыкмаматов, Наталия Никитенко келди. Ошондой эле Болот Шер, Асия Сасыкбаева да жүрөт. Сот имаратына эалардын айрымдары кирди. Коомдук тартипти 20га чукул милиция кызматкери көзөмөлдөөдө.
Эскерте кетсек, 2017-жылдын 25-февралында Башкы прокуратура "Ата Мекен" фракциясынын лидери Өмүрбек Текебаевге жана башка адамдарга карата КР Кылмыш жаза кодексинин 303-беренесинин 1-бөлүмү (коррупция) жана 166-беренесинин 4-бөлүмүнүн 2-3-пункттарында (алдамчылык) камтылган белгилер боюнча кылмыш ишин козгоп, ошол эле күнү УКМКнын Тергөө башкармалыгына өткөрүп берген.
Козголгон кылмыш иштин алкагында Текебаев менен Чотонов кармалган.
21-апрель күнү Биринчи Май райондук соту эл өкүлү Өмүрбек Текебаевди 25-майга чейин камакта калтырган.
Текебаевдин үстүнөн "Альфа Телеком" компаниясынын башкармалыгына кирүүгө мүмкүнчүлүк берүү үчүн бир миллион доллар алганын айтып, депутаттын үстүнөн россиялык бизнесмен Леонид Маевский арыз жазган.
