БИШКЕК, 21-май — Sputnik. Учурда халал индустриясы болуп көрбөгөндөй өнүгүү жолуна түштү. Россияда өтүп жаткан RUSSIA HALAL EXPO көргөзмөсүнөн Кыргызстанда мыкты сатыла турган товарларды көрсө болот. Биз алардын эң кызыктуу бешөөсүн тандап алдык.
1. Элиталык халал азыктар. Колунда бар мусулмандар үчүн премиум класстагы товарлар сунушталат. Мисалы Сауд Аравиянын мыкты жерлеринде өстүрүлгөн курманын килограммы 2700 сомду түзөт. Ал эми Араб Эмираттарындагы шоколадды 5800 сомго алса болот.
Франциянын эң мыкты талааларынан чогултулган жүзүмдөн суусундуктар даярдалган. Алардын курамында спирт кошулмалары жок. Премиум азыктарга мусулмандарга тыюу салынган заттар кошулбайт.
2. Курандан сүрөө үйрөткөн балдар оюнчугу. Бул куурчак мусулман кийимин кийүү менен эле чектелбей, намаз окуп, курандан сүрөөлөрдү айтат. Булардын баасы 2000- 4000 сом.
Долбоордун негиздөөчүсү Эльза Хусметдинова жакынкы күндөрү мындай куурчактар Борбор Азияга да жетерин билдирди.
"Муну жайылтуу боюнча иштеп жатабыз. Учурда биринчи максатыбыз — Казакстандын рыногуна алып чыгуу. Ал жакка өзүбүздүн өкүлчүлүктү ачайын деген планыбыз бар. Бирок мындай куурчактарды алып кирүүгө уруксат береби деген негизги маселе турат. Имамдар менен кеңешсем колдонууга болорун айтышты. Башкысы намаз убагында куурчакты кутучага салып коюу керек", — деди ал.
3. Мусулмандар үчүн витаминдер жана биологиялык активдүү кошулмалар. Муну чыгарган компаниянын өкүлүнүн айтымында, бардык эле дарылар халал-продукциясынын талаптарына жооп бербейт. Айрым дарылар чочкодон, курт-кумурскалардан жасалат.
Аталган компаниянын өкүлү Любовь Галимова мындай дары кутучаларын зыяратка бара жаткан кишилер алып кетишерин билдирди.
"Биздин жетекчибиз ажылыкка барганда кыйынчылыктарга дуушар болгон. Мисалы, адам көп жерлерде вирустар көп болот. Ошондуктан аларга каршы препарттар жанында болуусу керек. Ошондой эле алар көп басат эмеспи, мындай учурда буттары чор болуп кетпеши үчүн да дарылар керектелет", — деди Галимова.
Белгилей кетсек, дары кутучасында ашказанга керектелүүчү дарылар жана витаминдер бар.
4. Мусулманча экзотика. Азыр халал стандартына ылайыкталып союлган бугунун этин деле сатып алса болот. Бирок аны арзан баада эч жерден таппайсың. Бугунун сүрсүгөн этинин бир килограммы 1600 сом турат.
Таттууну жакшы көргөндөргө шариятка ылайык адамдар өз колдору менен терген Арктика жемиштеринен жасалган кыямдардын түрү бар.
5. Халал түшкү тамактар. Белгилүү болгондой азыр мусулмандарга бир гана Азия ашканасынын тамактары эмес, шарияттын бардык шартына жооп берген европалык өзгөчө тамактар да сунушталат.
