БИШКЕК, 18-май — Sputnik. Дүйшөмбү күнү Washington Post гезити АКШ президенти Дональд Трамп Россиянын тышкы иштер министри Сергей Лавровго "Ислам мамлекети" террордук тобу боюнча абдан маанилүү болгон чалгындоо аракеттери жөнүндөгү маалыматты берип салды деп жазган.
Путиндин сүйлөгөндөрүн РИА Новости агенттиги сайтына чыгарды.
Анда Россиянын президенти Путин Лавровго Трамп менен болгон сүйлөшүүлөрдүн сырын айтпаганы үчүн сөгүш жарыялай турганын тамашалап айткан.
"Америкада саясий шизофрения күч алууда. Анткени азыркы президентке карата айтылып жаткан айыптоолорду мен башкача сыпаттай албайм. Лавров менен бул темада сүйлөштүм. Ага сөгүш жарыялаш керек экен, себеби мага да, атайын кызматка дагы сүйлөшүү учурунда айтылган сырлар менен бөлүшкөн эмес. Эгер АКШ кааласа Лавров менен Трамптын сүйлөшүүсүн жиберүүгө даярбыз", — деди Путин.
АКШ президентинин улуттук коопсуздук боюнча кеңешчиси Герберт Макмастер Лавров менен Трамп жалпы коркунучтар тууралуу сүйлөшкөнүн айтып, булактар же чалгындоо кызматтарынын иштөө ыкмалары боюнча маселе талкууланбаганын билдирди.
