БИШКЕК, 15-май — Sputnik. Кыргызстанда бир жыл ичинде сегиз миң үй-бүлө ажырашкандыгы тууралуу "Балдарды коргоо борборунун" координатору Роза Сулайманова Sputnik Кыргызстан агенттигинин маалымат борборундагы видеокөпүрө учурунда билдирди.
Бүткүл дүйнөлүк үй-бүлө күнүнө арналган видеокөпүрө Минск, Астана, Бишкек, Ереван жана Кишиневдун башын бириктирди.
Сулайманованын айтымында, 2016-жылы 46 миң жуптун никеси расмий каттоодон өтүп, бирок сегиз миң жуп эки ача жолго түшкөн.
"Өлкөдө кыздар 16-17 жашында турмушка чыгып алган окуялар көп. Жаштар үй-бүлө курууга абдан шашылышат дагы, кийин ажырашып кетет", — деди Сулайманова.
Ошондой эле Кыргызстанда расмий каттоого турбай эле, нике кыйдыруу аркылуу жашап жүргөндөр көп экени айтылды.
Эске салсак, муфтият өспүрүмдөрдүн никесин кыюуга тыюу салган буйругун былтыр декабрь айында чыгарган.
