Бишкек — Нарын — Торугарт мамлекеттик трассасы өткөн Оттук айылында кичи автобус баланы тебелеп кеткенден кийин эл жолду тосуп, бүгүн ылдамдыкты азайтуучу жол тоскоолдуктары чекесинен орнотула баштады. Бул туурасында аталган айыл өкмөтүнүн жетекчиси Автандил Молдосалиев Sputnik Кыргызстан агенттигине кабарлады.
Аталган айыл Нарын районуна карайт. Айыл өкмөтүнүн жетекчисинин айтымында, Оттук айылы аркылуу өткөн Бишкек — Нарын — Торугарт мамлекеттик трассасында кырсык көп катталат. Анын бир мисалы бир күн мурда болгон кырсык.
"Оттук айылы аркылуу өткөн трассада жол кырсыгы көп болуп, мал-жаныбыз зыянга учурап келет. Мал эч нерсе эмес, ал тургай адам өмүрүн алган учурлар көбөйүп кетти", — деди Молдосалиев.
Айыл жетекчиси аталган маселени чечүү боюнча тиешелүү тараптарга, анын ичинен Транспорт министрлигине бир нече ирет кайрылуу болгонун айтты.
"Ылдамдыкты басаңдатуучу дөңсөөлөрдү коюп бергиле деп каттарды жазганбыз. Каттын баары "тигил карайт, бул карайт" болуп кете берип, жыйынтык чыкпай келген. Кечээ, саат кечки бештер чамасында жергиликтүү үй-бүлөнүн тогуз жаштагы баласын Каракол — Нарын багытындагы маршруттук такси уруп кетип, каза тапты", — деди айыл өкмөтү.
Анын айтымында, кайгылуу окуядан кийин жол тосулуп, эл катуураак талап кылган соң, ылдамдыкты азайтуучу жол тоскоолдуктары чекесинен орнотула баштады.
