БИШКЕК, 9-май — Sputnik. Кыргызстандын президенти Алмазбек Атамбаев Улуу Жеңиштин 72 жылдыгына карата өткөрүлгөн эскерүү-митингге катышып, ардагерлерди куттуктады.
Иш-чара Бишкек шаарындагы Жеңиш аянтында өттү.
"Баарыңыздарды Улуу Жеңиштин 72 жылдыгы менен куттуктайм! 9-май – ар бир кыргызстандык үчүн өзгөчө майрам, үй-бүлөлүк майрам, ыйык майрам. Биз бүгүн Улуу Ата Мекендик согушта жана оорукта Жеңишке салым кошкон ардагерлерге башыбызды ийип, таазим этебиз", — деди президент.
Ал кыргызстандыктарга кайрылып, улуу муундар алып келген тынчтыкты сактоо зарылдыгын айтты.
Мамлекет башчысы каалоолорун айткандан кийин согуштун катышуучуларына буйрук кылды.
"Президент катары, Куралдуу күчтөрдүн Колбашчысы катары сиздерге буйрук берем. Бар болгула! Аман-эсен болгула! Эмки 9-май майрамын сөзсүз бала-чака менен чогуу тосуп алгыла! Жараткан баарыңыздарга чың ден соолук, бак-таалай берсин! Жараткан элибизге биримдик, жерибизге берекет берсин!", — деди президент.
Бүгүн дүйнөнүн көп өлкөлөрү Улуу Жеңиштин 72 жылдыгын белгилеп жатат.
